海鳴威歎慢板做樂壇家輝

內地歌手海鳴威憑一首《我的回憶不是我的》而為人認識，同時俘虜不少樂迷心，但原來情歌王子背後，周身刀、張張利，跳舞與創作亦相當有睇頭，最近再度出碟的他卻收起勁舞，實行先以慢歌打入香港市場，問到是否擔心與同公司的陳偉霆（William）鬥舞？他說：「唔係，只不過香港樂迷係由一首慢歌而認識我，都希望慢慢滲入佢哋嘅世界，同William唔同風格，唔會有比較，都想合作。」

出道以來一直被指樣貌與影帝張家輝相似，問到海鳴威會否考慮殺入影壇？他表示：「我算係執着嘅人，自己對音樂有目標同理想，如果歌唱事業去到頂峰，先考慮其他發展！」

沉默築護罩

未知是否因為樣子相似，海鳴威竟然連思想亦與張家輝差不多，Cool到爆的他一樣深藏搞笑天分，他說：「如果真的要演，我會選喜劇！我覺得自己可以好搞笑，功夫片睇就可以，演就唔得喇，因為真功夫要經過好多年嘅鍛煉，功架呃唔到人！」嘴邊說着為人風趣，但臉容卻不帶半點笑容，海鳴威坦言以沉默為自己建築保護罩，他說：「其他人唔了解我可能都係件好事，咁樣可以保護自己，有時候太坦白只會令自己吃虧。」

場地：Quando Cafe

採訪：音樂組