拉姑兩公婆心心相咀
狄波拉（拉姑）與老公鬍鬚Kong昨日穿上心心情侶裝，拍拖到中環置地廣場撐枱腳，情到濃時更公然咀嘴，十分恩愛。提到孫仔Lucas加入娛樂圈，拉姑竟極力反對，但卻舉腳支持新抱仔張栢芝復出。
張栢芝自上月中為老公謝霆鋒誕下二少爺Quintus後，作為嫲嫲的拉姑可謂忙個不停，除了照顧長孫Lucas外，又要照顧孫仔Quintus，昨日她趁着空閒，即與老公鬍鬚Kong拍拖到中環行街歎茶。約下午2時半，拉姑與老公穿上同款日本潮牌COMME des GARCONS心心情侶裝，前往置地廣場High Tea，二人初時面對面坐，邊食邊談心，但當拉姑食飽飽後，即主動坐到老公身旁，依偎在老公肩膊撒嬌。
煙韌睇時裝
未幾拉姑人有三急返回座位拿起手袋，當着眾人面前與老公咀嘴，之後急急腳往洗手間解決。解決完拉姑獨自往附近的時裝店閒逛，但睇完一輪卻沒有收穫，之後再往銀行辦理事務；而鬍鬚Kong則一支公在看報紙打發時間。
約半小時後，拉姑相約老公在另一間時裝店會合，二人睇衫又睇鞋，當拉姑揀選新裝時，鬍鬚Kong在旁給予意見認真體貼。當發現記者拍照，拉姑再次撇低老公，進入附近一間朱古力專門店，向店員詢問了幾句，店員送上一粒朱古力給她試食。
撐栢芝復出
心情大靚的拉姑，步出時被問有指快將三歲的孫仔Lucas加入娛樂圈拍戲，她說：「拍咩呀？佢咁細個，又要返學又要顧住學其他嘢，邊有咁多時間，梗係唔會喺呢行發展住啦！」
但當提到栢芝復出拍戲，她反而舉腳支持：「都咁大個人，佢鍾意做乜，做屋企人嘅梗係支持啦！」再問到Quintus是否由她照顧時，她說：「梗係唔係我一個人湊啦！大家都有一齊湊。」
文、攝：追蹤組