容祖兒洗濕個頭通屋走

容祖兒昨日出席麥當勞活動，並深入廚房即場示範整薯條及沙律，有板有眼。事後祖兒接受訪問期間突然呼喊：「好慘呀！」她自爆前日凌晨由內地返港後馬上回家梳洗，正當享受淋浴洗頭之際，竟發現花灑沒有水出，她靈機一觸穿回浴袍走到弟弟的房間繼續洗頭，但她搽上護髮素後又再度停水，祖兒無奈表示：「我惟有包住個頭當焗油！」

晚上長期落簾

問祖兒穿浴袍不擔心被偷拍？她即表示：「日頭因為外光內暗影唔到，所以冇落簾㗎，但夜晚就會長期落簾，我都有諗過會唔會畀人偷影，但呢啲冇得避，媽咪意識好過我，如果我長時間坐喺廳佢一定會拉簾！」祖兒坦言與弟弟同住，故在家不會穿着太性感，反而在自己房中則會穿着較輕鬆。

促立法護私隱

由於曾有女藝人被偷拍，祖兒嘆謂：「咁樣對藝人真係好唔應該，但都改變唔到呢個大氣候，惟有自己保護自己！」問祖兒是否覺得政府應該要立法？她說：「想咗好耐，演藝人協會都可以幫吓我哋，因為被影嘅藝人感受最深，希望佢哋正視一下！」

此外，謝安琪早前演唱期間被踢爆遲入key，祖兒坦言歌手公開演出時經常遇到突發事件，但都要臨時執生，問她有沒有建議給謝安琪？她說：「冇喎，但我自己會曲不離口囉，因為真係鍾意唱歌嘛！」

文：音樂組