小齊硬啃易服吻驚到擘口
任賢齊收到「38F版鍾嘉欣」做生日禮物，雖然「生日女郎」表現豪放，兩度向小齊獻吻及強行要小齊揸胸，可惜該女郎是助手「反串」，難怪小齊對這飛來艷福驚到口擘擘，生日流流慘叫救命。
小齊、袁詠儀、方力申及謝安琪齊出席「點滴是生命」慈善活動，昨日是小齊44歲生日，大會送上壽包、生日蛋糕及刻上一家四口姓名的保暖杯做賀禮外，現場突然出現一位化濃妝艷抹、留有一頭長髮，上圍達38F Cup的大肚「美女」前來祝壽搞驚喜。
要平復情緒
當小齊定眼一看，有幾分似鍾嘉欣的「美女」，原來是他的男助手喬裝而成，自稱是小齊「背後女人」的助手送上禮物後，在全場起哄下，滿頭大汗的助手兩度向小齊獻吻，雖只是錫面不是錫嘴，但小齊已嚇到口擘擘，強顏歡笑說：「好驚喜呀，你好大犧牲。」合照時，翹住小齊的助手強行將小齊的手放在他的假巨胸上，小齊慘叫救命說：「咁我點做人呀？」又望住摸過胸的手發呆，不過他仍大讚對方樣子ＯＫ，如改由另一位男助手扮，他相信會喊。
遭蹂躪的小齊接受訪問驚魂未定，頻說：「佢本來好怕醜，今次係最大嘅驚喜，佢係咪加咗人工？定係怕畀人炒呀？（揸佢胸有乜感覺？）揸自己好過，揸個真嘅。」問到如何慶祝生日？他先說不知，因要先平復情緒，但記得仔女送生日卡，女友則送袋給他。
慘變花面貓
小齊近日不停慶祝生日，早前又在北京和歌迷搞生日會，可是他又被人掟蛋糕變成「花面貓」，故小齊說：「我都係怕慶祝生日，蛋糕掟多過食，整污糟地方又要賠錢。」他在活動上捐了十萬作善款，小齊表示因收到很多禮物，覺得應回饋社會。
採訪：音樂組