陳法拉享受擘髀
陳法拉在去年播出的電視劇《有營煮婦》換衫晒Bra一幕成為全城熱話，正播出的《蒲松齡》法拉又以肚兜示人，一於再派冰淇淋。不過，法拉反而享受反串演出，讓她能感受做男人的無拘無束！
雖然又有幕前性感，但陳法拉笑言肚兜示人不會太過震撼：「古裝性感得去邊？都係露吓膊頭仔！嗰幕係劇情需要，講鍾嘉欣為咗驗明我係咪狐仙要我除衫。大家咪將焦點放喺呢場，套戲落重本喺特技，又有好多神怪嘢睇，成班演員都好畀心機去演。」又有性感演出，可會惹來男友薛世恒不滿﹖她笑說：「冇聽過佢complain，好多朋友都話係小意思。」法拉又透露男友是其捧場客，看得投入時更會偷偷笑。
束胸反串獲讚
劇中飾演狐仙的法拉一嘗反串，更被讚十分俊俏，法拉表示：「原來做男人好輕鬆，可以擘大腳坐，唔使理儀態好舒服。」而法拉為求效果逼真，反串時既束胸兼加厚戲服，結果男子漢效果理想，辛苦也是值得。
不過，最痛苦是法拉在拍攝時弄傷頸，她說：「戲裏面好多吊威吔場面，吊威吔時整親條頸，好似『瞓厲頸』咁郁唔到，之後開工就變咗機械人，都要半年先好番！」
採訪：影視組
攝影：馬永堅
髮型：PRIVATE i（Ling Chow）
服裝：A｜X