Fiona電台爆粗 祖名：直播緊喎！
近年「玉女大解放」的薛凱琪（Fiona）昨日被網民指她於電台節目作直播時講英文粗口，引起不少回響，而晚上她與緋聞男友房祖名出席活動時雖然作出解釋，但卻被祖名踢爆平日有講英文粗口，認真唔面！
Fiona與祖名近排因工作關係經常一同出席活動，而二人昨日出席電台直播節目時，Fiona疑因不小心把杯麵的湯濺在地上而情急爆粗，說了一句「Sh×t」，事件迅即引起網上的熱烈討論。而網友即時在電台網頁討論區上指Fiona爆粗，強烈要求她親自道歉，又指她在節目呼喝房祖名和主持艾粒，又寸又無禮貌，事後記者上網重聽節目，發現已刪掉此句；本報向電台了解，外事務部發言人回應：「Fiona係鬼妹仔，只係真情流露說話。」
食杯麵雪雪聲
而晚上二人又再出席另一活動，Fiona就疑似爆粗事件作出解釋，她說：「我冇（爆粗），只係喺度食杯麵，食到『雪雪聲』o者！（如果你真係講咗，覺唔覺得係粗口？）睇你點睇啦，可以係解糞便嘅。」
至於祖名對於Fiona疑似爆粗一事，他笑言：「『雪雪』嘛佢話係！我喺直播室聽都以為係講粗口，擰轉頭望一望佢。（平日佢有冇講過？）廣東話我冇聽過，不過有時我嚇佢，佢驚時會好似好快咁食一箸麵咁咯！」問到祖名聽到她講Sh×t後的反應是如何時，他表示：「平日冇乜嘢，反而今日個反應就大啲囉，嘩，直播緊喎！」
文：影視組