阿嬌否認同William拍過拖
英皇電影《前度》報捷，昨日主角阿嬌、William和詩雅一同出席朗豪坊UA舉行的謝票見面會，而William更與詩雅扮售票員即場賣飛。近日有匿名人去信報館，指陳偉霆（William）曾連追鍾欣桐（阿嬌）、蔡卓妍（阿Sa）、鄭融及鄧紫棋，更與阿嬌拍拖個多月。William昨對此回應：「信入面嘅女主角全部同我拍過戲。我冇同過阿嬌拍拖，亦冇追過阿Sa，有證據就攞出嚟，否則就唔好再造謠，（避忌啲？）我一向都避忌，工作時工作，但唔會影響我同佢哋嘅朋友關係。」
阿嬌亦說：「係咪玩㗎，拍個幾月拖？我哋拍套戲都冇個幾月啦，（冇撻着咩？）冇可能，佢唔係我杯茶，亦唔夠膽追我，當我係師姐驚咗我。（話佢用SMS追過阿Sa？）咁有冇話佢追過周慧敏呀？冇咁嘅事，同埋佢都唔覆SMS嘅！」
