咩鳥開槍依然企定？
今次Gag神要問嘅題目某程度上可以話係動物題，識唔識答就要睇你對鳥類嘅慣性有幾熟悉！歌手們唱歌就叻，唔知佢哋會唔會畀同樣識唱歌嘅小動物考起？
問題：森林中有十隻鳥，獵人開槍打死其中一隻，其餘九隻卻沒有飛走，仲企定定喺度，點解？
可嵐：「佢打緊麻雀？嗯……真係估唔到喎，點算呀？因為其他都已經死晒？呀！我知係雞，佢哋都唔識飛！」其實可以聯想到唔同種類嘅鳥，可嵐已算好醒，不過雞受驚起上嚟可能都會識飛，唔係點叫「雞飛狗走」！
郭穎橋：「吓！爛gag題？（靜止10秒）嗯……冇頭緒喎！鳥呀？因為佢哋『料』事如神，知獵人唔會殺佢哋！因為佢哋係假嘅！哦！佢哋腳軟走唔郁，都唔啱？真係唔識，請開估！」唉！阿橋，你連四字詞出埋都估唔到，惟有講個答案你知啦……
James@Square：「雀仔？唔係喎係『鳥』，即係關個『鳥』字事啦！哦！我知喇！因為佢哋係走不『鳥』，咁都啱？因為個故事完『鳥』，真係『鳥』嚟嘅？通常都係叫『雀仔』啫！係鴕鳥，塞個頭落地！」搞笑完一輪，都算你估到答案啦！
答案：因為嗰十隻係鴕鳥，見到有個同伴死咗，第一時間驚到塞個頭落地下！