梁漢文蘇永康連環仆尷爆
BIG FOUR昨日舉行簽唱會，蘇永康和梁漢文（Edmond）相繼仆倒火羅爆，Edmond更自爆撞及「袋邊」，而歌迷則送上紙紮飛機和通行證予四人環遊世界，認真大吉利是！
許志安、梁漢文、張衞健和蘇永康四位BIG FOUR成員昨日現身apm出席「THE BIG FOUR香港站DVD+CD簽唱會」，吸引大批歌迷到場支持，四子除了獻唱外，更與歌迷大玩遊戲，安仔臨時要求康仔和健仔一個做龍門一個射球，當健仔踢出衝力射球時，守龍門的康仔竟整個人跌倒地上，眼見三子爆笑，康仔即手拿足球追着眾人「省波餅」報仇，嚇得三子雞飛狗走。
九秒九彈起身
四子獻唱一曲後，Edmond站在台邊自顧喝汽水解渴，但當他擰轉身時不慎撞到台邊喇叭並趴在台上，身手敏捷的Edmond即時九秒九彈起身，並詐傻反問：「咩事？」事後Edmond表示：「冇事，冇受傷，只係『high』到袋邊！（袋邊？）係褲袋邊呀」身旁的健仔即寸他經常在舞台上受傷，Edmond即死撐：「只係TVB嗰次傷腳啫，我有咗上次經驗所以好快彈番起身！」但健仔繼續寸他：「你專揀舞台跌，所以快起快跌！」
其他製品太貴
活動至尾聲，歌迷上台向四子送上禮物，其中兩樣是用紙製成的飛機及通行證，寓意飛機可帶四子通行全世界舉行巡迴個唱，但接過禮物的康仔笑言：「下次送禮物可唔可以用第二種物料，唔好用紙紮！」事後康仔抵死表示：「我哋都體諒歌迷，可能佢哋覺得其他製品太貴，紙紮平啲！」另外，對於有周刊指安仔舊愛將於年底成為「許太」，安仔只淡然表示：「唔回應喇！」
文：音樂組