克勤怕羞家棄穿英軍戰衣
世界盃昨日凌晨上演英美之戰，原以為強弱分明，豈料賽果1:1和局收場，圈中英格蘭球迷大叫失望，李克勤怕羞家棄穿英格蘭波衫，Ella更笑嘲英格蘭守門員格連撲波動作似蟾蜍，認真毒舌。
昨與岑潔儀、羽翹等出席護老活動的Ella，表示前晚跟家人一齊睇波捧英格蘭，可惜賽果差強人意，曾於英國留學的她說：「我班英國朋友全部用粗口鬧個龍門，你有冇睇個守門員？佢咁啱又叫Green（格連），又着住件綠色衫，仲要救波個姿勢直情似足一隻蟾蜍。」Ella表示完場後心情難以平復，直至昨晨六時才能入睡，問到男朋友是否一齊睇波？她說：「冇呀，冇邀請佢添，咁我同佢又住得遠，咁夜睇波唔係咁方便。（男友係法國人不捧法國？）睇波對事唔對人，我繼續捧英格蘭。」
而克勤原本打算穿英格蘭球衣出席長者活動，最終怕「羞家」而放棄，他說：「場波真係好失禮，不過發生喺英格蘭隊真係見怪不怪。」他表示連日來的賽事都平平無奇，只有南韓跟阿根廷算合格。
劉浩龍激進分子
克勤除了出席活動時大吐苦水，更在微博留言，痛心疾首說：「為何英格蘭會經常輸這些低B波？歐國盃外圍賽輸畀克羅地亞那球都仲未可以忘記，今晚呢球……唉！」而傅珮嘉亦在微博嘲諷：「咄……低級失誤……守門的你有聽到講評人怎麼形容閣下嗎，我的媽吖！」女星孟瑤則上載了一張36E巨胸外國女星的照片，送給格連做女友，以諷刺他守龍門失敗。
此外，劉浩龍、洪杰等出席慈善足球賽均大表不忿，劉浩龍自認激進分子，洪杰則表示跟朋友一齊睇波，當見到美國追和時都忍不住爆粗狂鬧。
採訪：音樂組