周永恒虐畜為樂信教懺悔
一個讀三年班的男孩，某次回鄉省親，炸死魚兒、摔死小雞、射死大雞……虐畜成狂，長大後的他迷途知返，還信了耶穌，第一次下跪懺悔，就是為在鄉下的惡行向耶穌認錯，他就是周永恒（Roy）。
「媽咪鄉下喺雲浮，細個時公公帶我哋返鄉下，嗰時自己好曳，玩埋啲嘢好變態、好殘忍。」自認衰仔的Roy說：「我哋條村有個魚塘，我試過攞一支粗過潤唇膏嘅炮仗擲落去，炸到啲水彈起幾呎，啲魚反晒肚；又試過將啲雞仔擲上天，睇吓佢哋識唔識飛，結果雞仔跌落地死晒；仲試過用玩具槍射大雞當打獵，真係射死啲雞。」
射爆玻璃
回想當年的頑劣行為，Roy都自嘲變態、殘忍，他毫不隱瞞地數臭自己：「我仲試過喺『雲浮大酒店』門口玩放煙花，點知好似穿雲箭咁，射爆酒店門口玻璃，嚇到我哋即刻『着草』走，逃之夭夭。」
重拾自信
小時候錯過、曳過，長大後信教的他第一次下跪祈禱懺悔，就是為虐畜向耶穌道歉，Roy說：「當時腦海插入好多畫面，擲雞上天、買雞打獵殺佢、大個打交、兇人、溝女飲酒，做Artists之後好驕傲、懶勁，同家人關係唔好、吸毒……呢啲畫面一次過晒嚟，向神要求原諒；懺悔之後，出街望人都有信心，可以抬高頭，希望大家知道我做錯事，唔好學我，我報以微笑，人哋亦回以微笑，我先至原諒自己、釋放自己。」
文：音樂組