郭力行練泰拳操Fit 再闖樂壇
近年主力拍電視劇的唱作歌手郭力行，今年決意重返樂壇：「我都兩年冇出過碟，今年七月會出ＥＰ《郭力行叁》，然後年底會再出大碟。」從前造碟事無大小都會參與的他，這次回歸原點，只係負責創作同唱歌：「我想搵多啲人合作，好似填詞就搵咗甄穎珊同周耀輝，甄穎珊幫我填咗首《萬世蠢人》，我知佢嘗試向呢方面發展緊，新人嚟講佢都填得ＯＫ㗎！」為以最佳狀態示人，郭力行最近勤練泰拳操肌，曾是羽量級比賽冠軍的他謂：「之前拍劇好忙，有年幾冇打過，最高峰嗰陣日日都會去打最少兩個鐘，就算唔打都去聞下拳館陣味，依家會Keep住打番，希望每個星期打到三、四日就最好！」
