鄧芷茵打正旗號做實力派
剛加盟「星娛樂」的女新人鄧芷茵（June Tang）打正旗號以「不玩神秘、只憑聲音感動你」殺入樂壇，大大隻標題擺明力撼黎明神秘新女JW，而June亦揚言只靠實力取勝，不愛收埋、玩神秘！
現年24歲的June去年曾與日本女歌手岩村菜菜美組成J-Twins推出過一隻單曲《My Dear Friend》，二人合作完結後，June被唱片公司力斟加盟，繼而「單飛」發展再戰樂壇，日前她接受訪問時，坦言不會因獨立而感到徬徨，反之感激唱片公司的提攜，對於宣傳口號「不玩神秘 只憑聲音感動你」被聯想到力撼黎明神秘新女JW？June表示：「唔關事，只係形容我自己，我個人比較outgoing，鍾意同人傾偈，唔鍾意收埋自己，所以唔會玩神秘！」
努力演繹好音樂
至於會否擔心外界拿她和JW比較？June表示：「冇咩所謂，大家都係今年新人，而且每個歌手都有自己長處，我會吸取人哋嘅優點去鞭策自己！（覺得自己有咩優勝之處？）唔好話優勝，樂壇有咁多人，唔可以話一個人玩晒，當中包含好多唱得之人，只要大家一齊努力，樂壇先會百花齊放！」June揚言不會規限自己歌唱風格，盡量給自己多嘗試，只要是好音樂，她都會努力去演繹。
June亦不避嫌告知大家與男友拍拖兩年，感情十分穩定，兩人於加拿大參加歌唱比賽時認識並展開戀情，雖然June跟身在廣州工作的男友相隔異地，但雙方每日均會靠電話聯繫，問她男友可擔心自己入行後變心？她說：「唔會，咁我都驚佢喺大陸識其他女仔啦，大家互相信任啫！」
採訪：音樂組
攝影：沈健程
場地：川燒
化妝：Marsha Ma
髮型：Zing Wong