田雞自降身價幫星爺

田雞坦言初入行時困難重重，家人、同事、朋友都叫田雞不要發夢，但田雞偏偏「唔信邪」，別人愈叫他不要，他偏偏就要做得好，結果誤打誤撞加入麗的電視做茄哩啡，開始了娛圈生涯。

許多人認識田雞，都是因為周星馳的電影。田雞表示跟星爺認識是在九二年，但真正開始合作，就是到田雞為陳嘉上執導電影《武狀元蘇乞兒》做製片的時候。二人其後一同演出《九品芝麻官》，直至九六年周星馳設立星輝公司，開拍電影《食神》，就邀請田雞加入幫忙。田雞表示：「星仔叫我入去佢公司幫手，開頭連銜頭都冇，佢個班底話冇位啱我，又話唔知我嚟做乜嘢，跟住星仔就同所有人講『田雞係嚟幫我』，我就做咗策劃、統籌，即係升咗職，但我人工仲要減，星仔有一個監製仲同我講，幫得星仔就唔好介意錢，所以我係減人工幫佢，由三萬五千元月薪減到二萬五千元，（點解咁想幫星爺？）因為大家理念幾相符，同星仔拍戲係享受，可以做一啲有要求的電影。」

拍《食神》不再被排斥

田雞坦言好喜歡《食神》這部電影，因為是由他被同事排斥到接受的一部電影，他表示：「我拍《食神》嘅時候，大家都唔係好認同我嘅加入，到之後佢哋知我係做得嘢嘅，慢慢開始認同，後期連副導演都做埋，滿足感好大。」

由《食神》開始，田雞幫星爺打咗十三年工，但因星爺電影產量愈來愈少，所以田雞兩年前決定離開星輝，最近就加入咗金牌大風，擔任電視創作總監，他透露有意把一些金牌電影如《獨家試愛》、《絕代雙驕》等拍成電視劇，吸引年輕觀眾。

文：影視組