James拗柴擔心工作驚‧痛
男子組合Square前晚與徐正曦、梁俊一等齊齊於籃球場上一較高下，Square成員何尚謙（James）在搶籃板落地時不慎「拗柴」，扭傷左腳韌帶痛楚萬分，即由好友們送到中醫診所看醫生，James說：「扭親嗰下已經係完全企唔到，好痛，個腦好似做戲咁停頓咗，見到三個畫面，第一係張X光片，第二係呢兩日嘅工作，最後係嚟緊下個星期就要去泰國拍戲，都唔知點算！」
James又言好友趙俊承（Gary）亦弄傷腳踝，幸好未算嚴重。經醫生診斷後，James幸好未有傷及骨頭，但屬嚴重扭傷需休息數天，他說：「我仲問個醫生第二日可唔可以即刻做嘢，佢反問我『你當我神仙呀？』，今次都可以話係『人生最痛』！」
佩服傷殘運動員
昨日James由爸爸陪同再到診所覆診，James聲線中隱隱透出痛楚：「傷勢冇嚴重到，但真係好痛，要敷冰鎮痛，基本上左腳係落唔到地，頭先爸爸車我去診所，平日覺得行去平台攞車兩、三步就到，今日要單腳跳住去！」由於天雨關係，為免再度弄傷患處，James在覆診時坐上輪椅，他說：「呢兩日真係深明傷殘人士會遇到嘅問題，更加佩服嗰啲傷殘運動員。」
文：音樂組