熊黛林明請城城食檸檬
日前郭富城（城城）受訪時，揚言緣分到就會考慮結婚，開口冧緋聞女友熊黛林（Lynn）。不過，Lynn似乎不太領情，昨日她出席活動時，坦言未準備好結婚，不會放棄事業，向城城大派檸檬。
昨日模特兒Lynn與Lisa S.出席Giorgio Armani全新產品發布會，對於城城指自己隨時Ready結婚，Lynn表現尷尬，笑稱與自己無關，並叫記者問城城身邊人，問到Lynn是否Ready？她坦言：「我未Ready，未準備好負呢個咁大嘅責任，一個家庭嘅維繫同組織係好複雜，我未識，而且我暫時放唔低事業。（結婚會退出？）至少有一半工作做唔到。（城城適婚年齡就快過，會唔會為對方犧牲？）我想畀多幾年時間自己去拚吓，女仔要有啲能力同錢先會安心啲。（咁城城要到五十歲先結婚？）真係唔關我事。」
愛情滋潤皮膚靚
向城城派完檸檬，Lynn轉頭即向對方耍冧招，提起城城拍攝《全城戒備》時，要在糞海中游泳，她即時大讚對方的專業工作態度。
另外，談到護膚，Lynn自認對皮膚還算滿意，她認同拍拖令人心情變好，皮膚質素也變佳，至於城城有否讚過她皮膚滑溜？Lynn婉轉地說：「都有啲朋友讚我皮膚好好多，靚咗好多。」
有此一着
熊黛林穿着Giorgio Armani的Tube Dress，藍色低胸短裙，完全可以突出Lynn的高挑身材及豐滿上圍，加上裙身上綴滿閃石，更顯高貴氣質。
文：名人組