沈嘉偉撇甩滾友做湊女公
一直希望為老公沈嘉偉生番個仔嘅邱淑貞（豆斗），上月初就被傳話佢有咗三個月身孕，雖然未得當事人證實，但近期的確少見豆斗蹤影。八太早前喺銅鑼灣見到沈嘉偉撇甩「打邊爐」好友郭富城、張智霖等，身兼母職帶兩個寶貝女行街，仲買埋腸仔氹囡囡，認真廿四孝老竇。
四十歲嘅豆斗自從九九年嫁畀時裝王國I.T老闆沈嘉偉後，即消失娛樂圈，仲先後生咗兩個寶貝女沈月同沈婷婷，過住無憂無慮嘅幸福少奶奶生活。其實豆斗都好想為沈家生番個男丁繼後香燈，有指佢喺屋企設壇同拜會寧波車，仲中西合璧調理身體，務求一索得男，
大女生性
雖然近年多次傳出豆斗有喜，但統統都係「食詐胡」。最近又再傳佢有咗三個月，雖然兩位當事人未有親口證實，但係近期的確少見豆斗蹤影。早前八太去咗銅鑼灣食晚飯，離開嗰陣就見到沈嘉偉冇同「滾」友城城、張智霖食飯，反而同兩個囡囡喺糖街出現，當時佢手上仲攞住幾本汽車雜誌，同埋幾條小朋友鍾意食嘅魚肉腸仔。佢好細心咁拖住囡囡過馬路，之後就去攞佢架幾百萬嘅紅色法拉利跑車。
手上拎住個小型寵物籃嘅婷婷，行到埋車旁冇手開門，爸爸見到梗係即刻幫皇帝女開門啦！好彩大女沈月生性，見到爸爸鬼咁狼狽，即刻主動幫妹妹調校張櫈，甚有家姐風範。沈嘉偉等兩個囡囡坐好後，先至坐上司機位開車離開。
巡視業務
雖然身兼母職，但沈嘉偉話晒係大老闆，點都要顧住盤生意。過幾日下晝四點幾，八太又撞見啱啱喺附近巡完舖嘅沈嘉偉，行咗去置地文華酒店攞車，好快手咁拎張銀紙畀泊車員，之後就揸住佢另一架黑色法拉利走人。