高海寧做宅女免引人犯罪
高海寧即將到南非採訪世界盃，但由於當地治安時有負面傳聞，所以她決定變「宅女」，除工作之外，其餘時間必定匿在酒店玩電腦以保安全。
四年一度的世界盃盛事即將在南非舉行，屆時各地傳媒將派遣攝製隊伍到南非進行採訪，但鑑於當地治安負面傳聞甚多，有見及此，有指日本多間電視台禁派遣女主播到南非，實行安全第一，不過無綫方面未有改變初衷，仍然派高海寧夥拍馬啟仁到當地拍攝世界盃特輯。
頻向母報平安
而高海寧對於即將要深入「虎穴」三十八日，表示不太擔心，揚言在當地一定會與其他工作人員集體行動，其餘時間必定匿在酒店，絕不會單獨出街，她說：「好多工作人員都叫我小心啲，所以首飾、貴重物品，唔係必需品都唔會帶去，而夜晚唔會出街，日間就集體行動跟大隊，唔使做嘢就一定留喺酒店，而我哋住嘅酒店保安好好，我已經準備帶埋電腦，到時匿喺酒店同屋企人聯絡，媽咪叫我隔幾日報平安。」
一定集體行動
至於無綫外事部副總監曾醒明，透露公司選人到南非，定必有考慮過治安問題，他說：「同當地有聯絡過，到時當地會有專人安排攝製隊採訪同聯絡等所有事，有提出過要特別注意人身安全。（有冇為攝製隊買保險？）所有出外拍攝都會買，我哋喺出發前都交帶咗工作人員要特別警惕，重要財物唔好放當眼，一定要集體行動。」
此外，高海寧與羅仲謙昨日出席商場活動，羅仲謙表示羨慕對方可以到南非睇世界盃，席上二人表現合拍，高海寧更大讚對方有風度，羅仲謙笑言：「我哋應該要交換電話，跟住約會、了解，先睇吓有冇進一步發展。」
文：影視組