江若琳舞出極限周身傷
江若琳（Elanne）近日為新歌排舞，挑戰多個高難度的動作，搞到周身瘀傷，即將要面對歌、影、視三棲同時發展，Elanne坦言：「我好辛苦，冇時間談情說愛！」
Elanne最近因拍劇跟陳鍵鋒傳出緋聞，她就一於少理，事關排山倒海的工作已經令她忙到一頭煙，除了拍古裝劇外，Elanne最近為新歌排舞，在星級排舞師High King的指導下，她竟然輕而易舉跳上男dancers的背脊，跪地、側手翻、疊羅漢等多個高難度動作，令人非常驚喜。
練到銅皮鐵骨
Elanne說：「自從上次演唱會跳完勁舞之後，大家反應都唔錯，所以今次主打歌都係快歌，再挑戰極限，我已經練到銅皮鐵骨，硬命一條！」Elanne一邊拍劇一邊練舞，撞到全身都瘀傷纍纍，身形更日漸纖瘦，連跳舞褲都要用扣針扣實以免甩褲，令媽咪非常心痛，她說：「媽咪見到我瘀晒，佢好緊張咁sms畀我，要我保重身體，錫身啲！」
Elanne透露七月將遠赴泰國開拍電影，屆時拍劇、錄音將同時進行，令她分身不暇，她說：「雖然係唔夠時間休息，不過真係好開心做到自己喜歡嘅工作，今次電影同劉青雲有對手戲，真係個好難得嘅機會！」
她笑言忙於應付三棲的工作，無暇再理會緋聞，問到跟陳鍵鋒見面會否尷尬？Elanne說：「一定唔會啦，我同佢同謝天華都係好好朋友，大家仲周不時拎啲緋聞出嚟講笑，（發展機會？）唔會啦，今次當幫套劇宣傳啦，我好辛苦，冇時間談情說愛。」
採訪：音樂組