志偉宴請夜鬼任飲任食
曾志偉昨日請來一大班圈中好友，出席其新食店開張儀式。多年來投資不少飲食生意的志偉，揚言開新舖對他全無壓力，更笑言有份到場的好友，可獲免費卡任飲任食，但只限凌晨三時後入座，兼只用一次。
志偉與板長壽司Ricky及米蘭站老闆Byron合資的「板獎自家火鍋」昨日開張，圈中好友王祖藍、錢嘉樂、阮兆祥、江欣燕、呂慧儀、洪天明、周家蔚、葉翠翠等均有親臨到賀。郭富城、小美、英皇娛樂集團亦送上花籃賀志偉新張之喜，大會更安排兩位火辣森巴跳舞女郎助興。
笑言兩日回本
又做老闆的志偉風騷地說：「本來想同Ricky喺新加坡開舖，但點知佢話喺香港搞啦，計劃開三間，合計我投資咗六、七百萬。（幾時回本？）過兩日啦！呢樣嘢好難講，反應好，一個禮拜都可以回本。以前我搞火鍋都搞到上市，不過都係啲拍檔好嘢，唔關我事。（唔預譚詠麟？）佢要做珠寶大生意，我唔敢搞，不過佢係好拍檔，佢好運。今日嚟撐場嘅嘉賓，我會送番張免找數卡畀佢哋，限凌晨三點後入座，限用一次。」
呂慧儀則說：「我都想開零食同糖果店。（識個有錢男友打本畀你開舖？）我只識顧住拍好啲劇，況且自己錢會緊張啲。（羨唔羨慕有啲港姐生財有道？）咁佢哋有本事，我唔識理財，要向媽咪請教至得。」
文：影視組