袁詠儀加強衞生抗病毒
已為人母的袁詠儀與李嘉慧及姚予晴昨日出席銅鑼灣的DYNAMIC BODY運動治療中心開幕禮，袁詠儀對於近日腸病毒肆虐表示很擔心：「酒精都殺唔到病毒，總之一返到屋企除完鞋就要洗手，惟有嚴謹啲！（唔畀個仔返學？）唔會！為咗驚就唔畀返學好蠢!我好信任學校喺衞生方面做得好。（個仔有冇試過停學？）冇，不過流感高峰期，學校有通告同email畀家長。香港自從經歷沙士教訓後，政府會加緊尋求解決辦法。」
李嘉慧對此亦甚為緊張：「我都好擔心，仲叮囑屋企人要勤洗手兼做好消毒工作，但唔會唔畀兩個女出去，總之樣樣小心，去過公眾地方返屋企都要洗手或者沖涼，唔會停止所有戶外活動，小朋友要學習，唔可以困住屋企。（食維他命增加抵抗力?）唔會，食多啲生果同疏菜，要營養豐富。」
