Baby拒同曉明度春宵

與黃曉明緋聞傳個不絕的Angelababy早前被拍到在北京一起看電影，Baby更被指出入男方家並過夜。昨日Baby出席adidas世界盃宣傳活動時，似乎未受該報道影響，左手戴上心形戒指，笑容滿面，穿上大會為她設計的One-piece球衣大擺甫士，原本纖瘦身材平平的她竟突然變得玲瓏浮凸，未知是否因有愛情滋潤而變得格外迷人。

對於被拍到跟黃曉明在北京約會，Baby說：「其實睇場戲好普通，冇咩大不了，成班朋友一齊，唔係約會，我哋冇試過單獨約會。（影到你去佢屋企喎。）冇呀，嗰度唔係佢屋企，有啲工作人員都係住嗰頭，本雜誌求其影張相就話係佢屋企。（話你谷胸。）係誤會，件衫唔小心拉低咗。」

拍拖低調保密

Baby又指是黃曉明找她做MV女主角，問可會像熊黛林和郭富城一樣因拍MV而撻着，她即醒目地反問：「佢哋有撻着咩？係佢公司搵我公司。（有冇親熱鏡頭？）你哋睇咪知囉。（點形容你哋嘅關係？）朋友，都幾Friend嘅。」再追問可有發展可能，她即帶點語塞說：「唔知呀。（因為冇時間而阻礙發展？）唔係，如果真係拍拖，有冇時間唔關事。（因為輿論壓力？）我唔會將輿論壓力擺喺心。（覺得黃曉明點？）佢好好人。（係咪好男友？好條件？）我搵男友嘅條件係保密，唔想人哋覺得我借佢做宣傳。如果我拍拖我唔會公開，想保持低調。（下次再約會？）有機會先啦。」

被問到和黃曉明有否發展可能，Baby立即語塞。

Baby揚言即使拍拖也不會公開。

嘆生活如坐監

記者致電Baby經理人Kim問到有關報道，她說：「我唔知呢件事，不過睇場戲冇咩大不了。（黃曉明一見記者即刻撇甩Baby喎。）可能佢畀人嚇親，我唔會回應。」此外，Baby昨日更新日本的Blog，揚言近日迷上微博致很久沒有更新日本Blog，與此同時又上微博指很多傳媒追訪她，沒有私隱，生活像坐牢一樣。而黃曉明經理人昨回應時說：「因為當時我不在場，不能代表曉明回應，過幾天曉明會嚟香港，等佢自己回應。」

文：名人組