張智霖直斥：好人有限
唐貝詩的「盆景貓」論除惹來一眾網友圍插外，連圈中人都睇唔過眼留言批評，貓癡周柏豪激動表示要報警，身為唐貝詩母親寇鴻萍第一時間在柏豪的微博親自留言道歉，經過一夜冷靜的柏豪，對於唐貝詩昨日再度在微博以英文留言，反指批評她的人不作求證便胡亂發言，柏豪說：「覺得佢心有不甘。（覺唔覺得佢不負責任？）之前會覺得佢唔識，依家會覺得好討厭，對佢有少少失望。」
張智霖在微博留意到唐貝詩叫他查明「盆景貓」出處才批評她，想不到令張智霖更加勞氣，留言表示要對此種人不聞不問。事後他接受電話訪問時說：「我對呢啲人不痛不癢，你唔係話畀我聽你係『大話精』呀？冇人suppose會留謊言，你不如話有恐怖襲擊，睇吓國家點對你！仲留啲咁嘅評論，好人有限啦。」