唐貝詩唔認冷血 阿媽攬上身

唐貝詩在微博揚言訂購「盆景貓」惹起公憤，但昨晨八時多Lydia仍「唔認衰」，還向一班曾圍插她的藝人包括熊黛林、張智霖、陳偉霆、G.E.M.等留言：「Wish u would find out the truth before criticizing others in public next time...」，來反斥他們未知真假就公開批評她，但這段留言很快又被她刪走。昨日身為母親的寇鴻萍為旗下美容產品舉行記者會，遲了近一小時才開始，寇鴻萍明顯為女兒有備而戰，並謂與女兒失去聯絡。

冇人生經驗

寇鴻萍為女兒事件解畫，強調那張「盆景貓」是電腦合成照，因當晚她看到Lydia放這張相後，即留言說好震驚和惡心，Lydia即致電給她說是假，是惡作劇，只想和朋友開玩笑。寇鴻萍謂：「當時聽到佢話係假後，自己就去咗瞓覺，諗唔到第二朝起身搞到咁犀利，雖然話惡作劇，但我都鬧佢、契媽（鄭裕玲）都鬧佢，用生命嚟開玩笑係好錯。」

寇鴻萍謂微博是公開式，而身為公眾人物所說的話更需負責任，生命是尊重不是拿來玩。講到Lydia被狂鬧，寇鴻萍謂：「我都控制唔到，佢得21歲，話大唔大，話細又唔細，佢冇乜人生經驗，但佢都道歉咗。」講到Lydia似未知錯，反留言怪責人？寇鴻萍即說：「我諗唔會，佢say咗sorry！（你叫佢嘅？）冇，我都搵唔到佢，佢需要時間平復下，佢細妹都叫我唔好再鬧家姐，怕鬧得犀利，佢離棄我哋，今次佢係上咗寶貴一課。」

買隻畀羽翹

問到女兒心理是否有問題？寇鴻萍即緊張說：「佢冇買，呢啲係犯法嘅！」怕不怕被指教女無方？寇鴻萍表示：「我又唔覺得咁大件事，做父母梗要教要管，今次我係有疏忽，即時制止咗就冇事，我係有啲責任嘅！所以鬧我都唔介意，因為教女係父母責任，依家仲咁多人幫我一齊教女更加好。」至於Lydia昨日下午又一次在微博留言：「希望大家會諒解，我真的沒有虐待動物的心，對不起浪費了大家時間。」而寇鴻萍亦於微博留言：「做母親，深深體會『養兒100，長憂99』。」

至於Lydia的好友羽翹昨日亦有份出席活動，她謂當晚看到Lydia的「盆景貓」時亦吃一驚，Lydia還說買隻給她，後來知道只是用來開玩笑，她不覺得Lydia心地不好，但今次拿小動物生命來講笑是不對，作為朋友都需要提醒她。

文：音樂組