徐子淇買藍天使博生仔
富豪李兆基早前以十八億天價買下一幅地，透露想和兒女住在毗鄰。昨晚千億新抱徐子淇出席活動時笑言希望盡快入伙，與老爺一起遊花園。她又特意買下一隻粉藍色天使的藝術品，寄望能生個男孫給老爺，認真抵錫。
昨日徐子淇在保鏢陪同下，穿上Gucci黑衫打扮出席「飛天使者」廣慈香港個展活動。她透露上周小B女生日，買了一對天使藝術品送給寶貝女：「我買時設計師仲簽埋名，好有意義，如果送衫同玩具大咗就唔啱着同埋唔會玩，但送藝術品就係無價寶。」
老爺唔住木屋
提到老爺李兆基以十八億買下一幅地，子淇笑說：「其實都幾好笑，塊地係有一日同老爺一齊搭車時見到嘅，佢同我講叫老公去買，我就話好貴叫老爺自己買，話得閒上去探佢，之後老爺就話佢去買，預埋我哋一份，仲叫我哋上埋去住。所以依家諗住起三間屋，一間老爺，一間我哋，一間大伯，因為想要三間都差唔多style，所以就要搵則師畫圖。（幾時入住？）預計三年，都想盡快，因為嗰度有花園，可以畀老爺散步同埋小朋友玩。」
子淇表示與老公李家誠都偏愛新潮的透視玻璃屋：「我同老公都鍾意open啲，我同老公講笑話想起間木屋用太陽能，感覺大自然好舒服。但老公話我嘥氣，話老爺點會住木屋呢！」
上周囡囡一歲生日，子淇帶囡囡到澳門玩樂，但行商場時遇見被人遺棄的小朋友，感覺十分淒涼。問到女兒的一對十六萬天使生日禮物是甚麼顏色？她說：「本來我淨係想買一隻粉紅色，但啲人話唔好，要買多一隻粉藍色，咁下一個就會係仔，所以我就買咗一對，希望遲啲可以將粉紅色嗰隻送畀個仔。」
否認人工受孕
早前有報道指子淇以人工方法追仔，她否認傳聞，並自言年輕，想自己努力嘗試。
文：名人組