唐貝詩訂盆景貓 群星鬧爆
寇鴻萍長女唐貝詩（Lydia）昨日凌晨於微博聲稱訂購一隻「盆景貓」，且上載一張極度殘忍的虐貓照，惹來全城圍插，身在英國的Lydia雖急忙道歉，但連契媽鄭裕玲都訓斥「冇腦」，愛貓之人周柏豪揚言會報警，情緒一發不可收拾！
今年七月便踏入23歲的Lydia，昨日凌晨竟「無知地」在微博上發表一篇傷透愛貓人士的文章，惹來極大回響！Lydia昨日凌晨在微博中張貼小貓被放入牛奶樽的相片，本已十分殘忍不人道，她竟附加一句「我今天訂購了一隻盆景貓，明天便有貨，Yeah！」其後友人紛紛留言勸她不要訂購，Lydia卻竟說「我覺得很可愛呀」、「依家倫敦好興！」等謬論，令一眾愛貓藝人群起喪鬧，更把她的文章轉發出去。
鄭裕玲喪鬧冇腦
身為Lydia母親的寇鴻萍（Isabella）亦留言說相片很殘忍，反問女兒是否開玩笑，並代女兒道歉。大約十分鐘後，Lydia見「勢色唔對」，收回訂購盆景貓的言論，並向大眾道歉，她「死撐」表示根本沒有「盆景貓」的存在，又說：「我本想證明這流言是假的，但我沒想我行開了10分鐘，回來後看見這麼大的回應。」雖然她急忙補鑊，但已觸怒愛貓之人何韻詩、周柏豪，甚至連她的契媽鄭裕玲亦以英文喪鬧「冇腦、冇sense和冇品味」，而柏豪痛斥她會「有報應」，又指如果她真是「收到貨」，便會立即報警。著名時裝設計師何國鉦說：「這個無腦的人是否Isabella的女兒？」
剷走照片兼道歉
自知理虧的Lydia在微博中剷走令人不安的貓照，又親自留言向周柏豪道歉，不過她似乎心有不忿，反罵鬧她的人：「我明明只是諷刺，但大家見其他人在熱烈討論就不要蝕底，火速轉發和詛咒我『變態虐待傾向』，卻反而自己連research盆景貓的來歷也沒有，這是一按搜查便會發現十年前已真相大白，照片也超級假，有愛心卻只會很清高去踩別人，我又沒有想過虐待動物！」
女兒唔接受批評
記者昨日致電Lydia，至截稿前未有回覆，至於寇鴻萍在電話中似有備以來，代女兒澄清照片是假，她說：「佢只不過貪得意，想整蠱啲朋友，我喺微博都有話好殘忍、好恐怖，後來佢見我留言，打畀我話唔係真，只不過講笑，你都知兩個女對我幾重要，今次佢真係犯咗錯。」
她又表示女兒不知在微博發表言論嚴重性，對於有網友用粗口罵Lydia，她說：「唔係咁好，佢未必一定鬧就聽，佢仲細，要解釋佢聽，佢第一次被公眾咁批評，老實講佢未必接受，因為佢性格都幾強，唔鍾意被批評。我成日同佢講佢咁性格，唔啱入娛樂圈。」
文：專案組