阿姐扯火：轉睇第二個囉！
殿堂級主持汪明荃（阿姐）近日在人氣節目《荃加福祿壽》內扮鬼扮馬兼大展歌藝，她的拍檔「福祿壽」王祖藍、李思捷及阮兆祥人氣急升，阿姐卻慘被網友狂轟唱功差及走音，更有人在Facebook組成反對阿姐唱歌的群組。昨日阿姐接受《巴巴閉邊個夠我查篤撐》的電話訪問，對於網友的批評，阿姐直言：「向來都有人話我唱歌唔好，我有睇觀眾留言，當中唔想我唱歌嘅聲音好強，但係都有好多人讚我，做節目梗係有讚有彈，明知係玩嘢咪笑吓算囉！」
結婚周年冇禮收
阿姐續說：「你睇到嗰個人唔鍾意，我都冇法，咪轉去睇第二個囉，至於係咪走音，我就覺得太過分！」她表示未有被事件影響心情：「好多歌我都唔熟悉，但係我都有練過㗎！我已經係刀槍不入，每個節目定位都唔同，有人話我唔肯放下身段扮嘢，我係唔會扮嘢，唔想同佢哋三個（福祿壽）有衝突，我扮嘢冇佢哋咁好嘛！」她指更有人反對她與羅家英結婚，阿姐帶點激動地說：「唔通我要離婚去Please（取悅）你哋呀？」
昨日佛誕是她與家英哥的結婚周年紀念，阿姐透露對方在內地工作亦未有送禮，又表示：「佢話共勉之喎！」而查小欣及眾好姊妹各自送上油畫贈興。
文：音樂組