Mr.演唱會添食巡迴港九新界
樂隊Mr.昨日舉行演唱會DVD簽名會，近千歌迷到場支持，氣氛熱烈。大會原定派發八百個簽名籌，但最後超額，Mr.表示會為所有到場的歌迷簽名，又自爆已做定熱身運動。
鼓手Tom坦言成功出DVD興奮得徹夜未眠：「我尋晚（前晚）自己都睇DVD睇到通宵，依家連妝都冇化。」問他們會否加緊舉行演唱會Part 2？Dash坦言主辦單位已積極物色贊助商：「佢哋都想我哋盡快落實，不過我哋想作多啲歌先，而且嚟緊同校長（譚詠麟）都有個音樂上嘅Project，佢七月個演唱會，我哋都有自薦幫手，好想報答番佢。（Part 1做巡迴？）上次喺九龍做，睇下可唔可以喺香港區或者新界區做啦！」