張曼玉變髮賀嘉玲
娛樂圈喜訊一浪接一浪，繼張栢芝再度誕下麟兒，劉嘉玲與梁朝偉亦傳出造人成功喜訊，有傳嘉玲有咗三個月，身在上海睇時裝騷的張曼玉（Maggie）得知喜訊大方恭喜嘉玲，但其髮型則隨着喜訊突然「謝」晒！
【劉慰思上海直擊】影后Maggie獲法國品牌Christian Dior邀請到上海出席剪綵活動及睇騷，大前晚她剪綵時戴上十戒並梳了個充滿力量的爆炸頭現身，一臉朝氣勃勃，但前晚Maggie隻身出席Dior裝騷時，充滿力量的爆炸頭忽然「謝」晒，變得平平無奇！
未需要再婚
問及Maggie有關嘉玲懷孕的傳聞，她聞言亦半信半疑反問說：「係咩？係真架？如果佢真係有喜就恭喜佢。」雖然嘉玲與偉仔已過着幸福婚姻生活，但曾經失婚的Maggie暫仍未想再婚，只望好好享受生活，問她何時才成家立室？Maggie說：「唔使，仲未有需要！我時間分配得好好，好滿足現在生活。」
查理絲閃爆
金像影后查理絲花朗亦特別抵滬出席睇騷，一身銀色cocktail dress的她成為全場最閃的金髮美人，上海正舉行世博，她卻說不會乘機參觀：「冇時間啦，其實我都唔係第一次到上海，我前兩日已經嚟咗，不過感冒，仲未有時間觀光。」除了兩位影后級人馬，前晚有份獲邀出席睇騷的還有湯唯、桂綸鎂、李冰冰、金像影后瑪莉安歌迪娜、中法混血女星Mylene Jampanoi、張雨綺、陳坤、四太梁安琪、周迅、徐熙媛等。