靚佬湯好心指點遭金美倫飛踢

靚佬湯與金美倫因拍《戀》結片緣，早前女方公開大讚靚佬湯身手了得，拍得住專業特技人。最近有片段拍得二人試戲時，靚佬湯與一名動作指導教金美倫起飛腳。初時動作指導拿着厚墊讓金美倫出腳，金美倫表現非常隨意，吃完手中零食才開始練習，靚佬湯則從旁觀看。

氣喘撐冇事

之後靚佬湯親自上陣指點，更向金美倫稱：「你大力踢過嚟啦！」金美倫稱已加強力度，但示意怕傷到他。靚佬湯即向動作指導笑指：「你怕傷到我?」然後再叫金美倫盡情踢。

當靚佬湯向右望時，手拿開厚墊，金美倫此時即起飛腳踢心口，踢到靚佬湯成個飛起，跌在背後放滿食物的枱兼發出巨響，嚇得伊人驚青說：「我的天！你有冇事？」靚佬湯即跳起來，氣喘地笑指沒事，但原本戴着的黑超已吊在耳邊。金美倫邊為他拿開墨鏡，邊問他是否需要冰墊，但靚佬湯只坐在一旁，笑笑口死撐沒事，金美倫亦返回工作崗位。

片段似流料

其實細心睇片，發現二人似演搞笑戲。當靚佬湯向右望時，鏡頭外那個動作指導暗地為他拿開厚墊，「導致」靚佬湯中飛腳。而且鏡頭剪接部分較多，未能確實見到金美倫是否真的踢向靚佬湯心口。不過，靚佬湯瞓身跌向放滿食物枱的一幕確是親身上陣。雖然片段似流料，但充滿喜劇味。

另外，有傳金美倫與姬赫遜舊愛棒球手Alex Rodriguez拍拖，令姬大怒，因她相信金美倫是利用Alex，報復當年Justin Timberlake與金美倫分手兩日後，便與姬傳緋聞的恩怨。

文：外娛組