高海寧拒晒冷封咪留空間
被譽為新一代「咪神」的高海寧，在夏天的水着季節竟然決定「封咪」，放棄與o靚模爭一日長短。「咪神」原來希望放長線釣大魚，她說：「想留番啲幻想空間，唔想一次過晒冷。」
高海寧近期積極Keep fit，三餐麥皮當飯食，成功除去十多磅豬腩肉。「咪神」積極Keep fit，莫非是為了在夏天以水着示人？她說：「如無意外都唔會着泳衣行騷，如果廣告同電影有需要就唔會抗拒。因為認定咗做藝人係終生職業，身材係天賦，應該好好運用，但就唔想一次過晒冷，想留番啲幻想空間畀大家。依家都積極進修唱歌、演技、英文，希望大家唔係淨係注意我嘅身材，會欣賞我嘅才華，唔想淨係畀人感覺得個殼。」
寫真留畀後生
夏天是o靚模騷身材博出位的季節，據說今年書展有大批o靚模寫真推出，高海寧認為展示天賦無可厚非，但也不能獨沽一味，她說：「初初入行將最靚嘅一面騷畀人睇可以，但賣點唔可以淨係得身材，要有其他，唔係一時間彈出都無以為繼，可以騷幾耐呀！」問高海寧會否出水着寫真﹖她說：「公司冇咁嘅安排，呢啲留番畀後生女啦。」