鄧麗欣傅穎死敵合唱唔怕尷尬
Cookies出身的鄧麗欣（Stephy）及傅穎（Theresa），屢傳不和，甚至「有你冇我」堅拒同台演出，不過由於「五餅碎」將於暑假舉行一場戶外敍舊音樂會，屆時兩位「是非人」將在台上與其餘餅女合唱。
組合Cookies於2002年出道，憑住青春活力俘虜萬千少男心，可惜玩了九個月因成績未如理想宣布解散。據知，有主辦單位近日積極游說「五餅碎」開騷，並邀請吳雨霏、楊愛瑾、Stephy及Theresa到場睇騷，屆時「五餅碎」大有機會即興拉四舊隊友上台合唱，Stephy與死敵Theresa再次同台合唱。
勢成焦點
Stephy承認有聽聞過有關活動，她說：「要睇檔期，都可能上台玩吓。（唔怕同Theresa同台成焦點？）唔驚，大家都專業，唔會尷尬。」而Theresa表示有時間都會出席，問到會否怕被拉上台？她說：「睇吓當時環境同氣氛，唔會抗拒。（同Stephy同台引起是非？）始終仲喺娛圈工作，實有同台機會。」
值得紀念
餅碎區文詩承認快將開騷，她說：「係有人接觸過我，所有嘢都未定，初步係想暑假搞。」曾舉行處女演唱會的吳雨霏大讚主辦單位有構思，她說：「都幾得意，如果成事一定去支持，始終拆夥咁耐，走番埋一齊好有紀念價值。」
採訪：音樂組