拉姑心情靚晒跑馬地睇樓
昨日下午三時許，狄波拉與老公鬍鬚Kong離開半山寓所曉廬後，相約地產經紀四出睇樓，似乎趁再度抱孫有意入市，結果拉姑分別在跑馬地、藍塘道與白建時道看了多間豪宅，每次逗留約五至十分鐘。當問到是否買樓送給孫仔時，她竟推說：「探朋友啫！今日好多朋友要探。（BB似邊個？）個個都似。」期間到茶餐廳醫肚等候司機接載婷婷、安志杰與汪明荃，然後一同往醫院探望栢芝。
另外，之前記者致電拉姑手機，發現又做嫲嫲的她心情零舍不同，當電話沒人接聽時，即換來拉姑親自錄下的鬼馬留言：「喂，係呀！生咗喇！生咗喇！多謝大家關心，見面再講，如果你哋有其他嘢，就留言畀我啦！多謝！多謝！恭喜！恭喜！」
其後終於聯絡到拉姑，她透露已煲了靚湯給栢芝飲：「都係多啲人奶嘅湯，好似木瓜魚湯。（有冇預備花膠同冬蟲草？）依家唔補得架！遲下先喇！」