栢芝細仔「謝家鼻」帶旺霆鋒

張栢芝誕下謝家第二位「明星B」，謝家上下均表現得興奮不絕，再任爺爺的謝賢昨接受本報及查小欣主持的《巴巴閉邊個夠我查篤撐》訪問時，仍難掩喜悅，他詳述栢芝入產房的情況：「栢芝係半身麻醉，推出產房時見佢眼仔碌碌相當精神，佢話一啲都唔攰唔痛，問佢有冇睇電視或鏡仔睇到生產過程，佢話冇，佢真係超人，係咪生仔機器嚟架！」BB出世眾人爭相拍照，產房逼滿二十多位親友。

獲封生仔機器

謝賢指BB肥嘟嘟十分精靈，比哥哥Lucas初出世時大塊面，亦擁有長而挺的「謝家鼻」，反而Lucas出世時像一個「檸檬」，問謝賢可有封大利是給新抱仔？他笑言：「咁俗，依家興環保呀，唔講呢啲，我只係享受做阿爺嘅氣氛。」現年七十三歲的他不免感觸一番：「希望自己再擺耐啲！（身體健康咪得囉！）都唔係架，人總要行呢一步！」

當年Lucas出世時霆鋒花三萬多元為愛兒預留臍帶血，據知今次二少出世，已有臍帶公司願意免費贊助，而霆鋒下周將復工拍攝內地的服裝及鞋履廣告，酬勞七位數，下半年除了兩套電影和一劇集在手，更有不少導演如關錦鵬、陳德森及林超賢等斟他演出，BB的腳頭相當好。

昨日養和醫院仍熱鬧非常，汪明荃、楊受成夫婦、謝婷婷及男友安志杰分別到醫院探望栢芝，阿姐透露送了利是給BB，又大讚BB好得意、好靚仔。當拉姑和鬍鬚Kong昨晚離開醫院時，被問到BB定了名字沒有？拉姑說：「暫時叫住二少爺先。」六時許謝賢離開，他透露栢芝飲緊湯，又笑呵呵說：「BB似我，真架，唔係講假！」

另外，栢芝昨日亦透過經理人表示：「多謝大家關心，好開心，希望BB健健康康、快高長大。」對於栢芝父母連日來不見蹤影，栢芝經理人表示因栢芝父親不在港，而栢芝媽因感冒怕傳染栢芝，故未有探望。

笑不攏嘴的拉姑，帶同汪明荃一同往探栢芝，婷婷與安志杰亦同車而來。	霆鋒的老闆楊受成亦有到醫院探望。	結集在養和醫院外的傳媒，時刻等着謝家公布的最新消息。

婷婷無意生B

此外，婷婷昨日出席Kiehl's活動，表示BB雖有點水腫，但很得意。問到婷婷可有生BB的念頭？她說：「冇諗過，自己一向都係玩人哋啲BB，玩完就畀番人。」她透露男友與BB生日僅相差一天，她在蛋糕上插了I love you的蠟燭慶祝男友生日，還親手弄了張卡。

文：音樂組