蘇永康孖兄弟濕平做埋美指
正所謂「人生難得有知己」！許志安、張衞健、蘇永康、梁漢文識咗十幾年，佢哋嘅友情分分鐘好過啲親兄弟。早前康仔同安仔、健仔去咗中環「濕平」（shopping），鍾意扮靚嘅佢做埋「美術指導」畀意見。夜晚康仔就變身廿四孝男友，陪女友Anita到銅鑼灣食飯。
四子由華星年代到家吓，一齊經歷唔少高低起跌，就好似多年前梁漢文（Edmond）陷入財政困境，當時好景嘅安仔就義不容辭出錢幫佢贖番架未供完嘅波子跑車。今時今日，呢啲咁重情義嘅兄弟去邊度搵吖？
撇甩Edmond
不過，八太早前就見到康仔、安仔同健仔去咗中環「濕平」，但就冇Edmond份。當日下午四點幾，康仔、安仔同健仔去咗ifc連卡佛行街，喺男裝部睇衫又睇鞋。對衣着講究嘅康仔全程做安仔軍師畀意見，而健仔就自己睇。
盡顯風度
咪睇安仔眼細，其實不知幾眼利！原本好專心咁揀緊鞋嘅佢，一轉身就畀佢發現咗企喺遠處嘅八太，佢冇黑面不特止，仲叫埋身旁嘅康仔同八太揮手打招呼，鬼咁友善。之後店員帶咗佢哋入VIP房試衫，相信佢哋斬獲都唔少呢！
陪完兄弟買衫嘅康仔，返屋企換完衫，夜晚就同圈外女友Anita去咗銅鑼灣一間海鮮酒家食飯，同場仲有一位女性朋友。埋單後，康仔率先行出門口截的士，但企咗喺街度等咗一陣都未截到車，於是佢就行前去街口截。當的士一到，康仔即刻幫兩位女士開車門，然後自己就坐車頭，非常有風度。