溫兆倫否認翻撻郭羨妮
溫兆倫日前在Blog上表達難忘「她」的「可愛」而被指「翻撻」舊情人郭羨妮，兩人分別表示為報道氣憤，但各有說法，口供不夾。女方稱雙方一年有一、兩次電話聯絡，但男方聲言沒有，指「有人」講大話。
郭羨妮（Sonija）與溫兆倫於02年合作無綫劇《牛郎織女》而譜出的「菠蘿包之戀」兩年便告終。日前溫於他的Blog上表達難忘「她」的「可愛」之情，經常夢見「她」而被指「翻撻」Sonija，報道更指Sonija說溫經常打電話給她，另報道亦指他最近來港買Benz。
叫魔鬼停止作孽
身在內地拍廣告的溫兆倫接受長途電話訪問，承認是來了香港買兩部Benz，鼓勵自己之餘亦用作送給居於香港的女友Winnie，但就「翻撻」Sonija一事，他卻矢口否認：「呢幾年冇打過畀佢，（Sonija話你成日打畀佢？）有人講大話，（二人仲係朋友？）朋友可以做，但真係冇聯絡，（Blog上傳情？）一定唔係講佢，係講潘星誼（內地女星），對方意外身亡，佢係我哋經理人公司捧出嚟嘅人，諗起佢心情難過，但有人歪曲件事，最近有賑災，災民冇飯開，仲做啲無聊事，叫啲魔鬼快啲停止作孽，唔係就落地獄。」
擔心別人有聯想
不過，準備返電視城為《隔離七日情》開工的Sonija，接過記者電話時非常勞氣：「我冇講『佢成日打畀我』，好離譜！佢個Blog寫嘅嘢係好耐之前嘅事，係fans話我知，我都擔心畀人聯想其他嘢，我親自打電話問佢，佢都話唔係講我，咁OK啦，其實分手亦是朋友，但我哋冇再見 面，一年都可能有一、兩次電話聯絡。」
當Sonija返到電視城後再被記者追訪，她繼續就事件回應：「佢冇話想追我，我亦冇諗過同佢一齊，佢有女友，但都祝佢幸福快樂。」
文：影視組