蔡少芬仆崩鼻證冇整容

蔡少芬（Ada）、陳豪、黃德斌及朱慧敏等昨日為劇集《飛女正傳》宣傳，眾人玩攀石及在高處躍至由藝員所持的帆布中，Ada在跳落帆布時竟不慎弄損鼻，痛得眼淚直流，事後笑謂：「個鼻損咗少少。（咪要去整囉？）好彩我天生麗質，咁就證明我下巴同個鼻係真嘅！」

死撐絕無抄襲

說到有網友指她在《飛》劇中演技過於浮誇，Ada解釋謂：「我都聽過有人咁講，但係又有好多人話我做到港女嘅衰格嘢。希望觀眾打開心房去睇啦！」Ada又直認是港女一名：「我係一個香港嘅女仔，又曾經係香港小姐代表！（你有咩特質？）充滿自信啦、覺得自己好正囉！（即係唔知醜？）咁又未到唔知醜。」說到《飛》劇被指抄襲七宗罪，Ada則稱：「超人唔係男就女，再唔係就貓同狗，而套劇講我幫港女去蝦港男，我亦都唔覺造型似《東方三俠》嘅張曼玉，大家元素都唔同！」

哎唷，衰咗！

好痛呀！

陳豪認似怪醫

陳豪則指知道《飛》劇於網上有不錯的點擊率：「我對收視都係平常心，（被指抄襲？）我個造型都試咗好多次，雖然出嚟我都覺得似怪醫，但係我哋絕冇抄襲成分。」而黃德斌適逢生日，獲眾人送吻祝賀。

黃德斌生日，獲眾人送吻慶祝。

陳豪攀石時遭其他藝人搞搞震。

文：影視組