關楚耀拆Jill愛有共識
關楚耀（Kelvin）因藏毒事件而龜縮一年多，昨日為復出鋪路接受電台訪問，但卻未敢現身見記者，他於訪問中以「好朋友」形容舊愛衞詩（Jill），自爆兩人有晒共識，先做好工作再談感情事。
Kelvin跟Jill這對「毒海鴛鴦」去年於東京因藏有大麻被警方拘留，事件驚動整個娛樂圈，雖然Kelvin返港後於記者會上公開耍冧，又口口聲聲表明好掛住仍在獄中的Jill，可惜閉關期間竟然偷偷飛到台灣密會美眉Mika，兩人同床又攬又錫，親暱非常，似乎將閉關懺悔的事完全拋諸腦後，事件令他形象再度插水之餘，連契爺譚詠麟、唱片公司等都大表失望，復工日子只好一拖再拖。
傷害Daddy最深
事隔一年後，Kelvin昨日接受電台節目《巴巴閉邊個夠我查篤撐》訪問，但就未敢露面見記者，他坦言復出心情緊張，接受訪問前都經常失眠，提到少爺仔慘淪落為「階下囚」，Kelvin坦言被困期間最掛住家人，他說：「公司對我期望好高，好用心咁栽培我，但我就好自私咁將事業一手摧毀。（對邊個抱歉最深？）我Daddy，我做呢啲事傷害咗佢。」
有keep住聯絡
問到跟舊愛Jill的關係，Kelvin竟自爆跟對方「感情上」有晒共識，他說：「我哋係好朋友，大家共過患難，同佢有keep住聯絡，知道佢生活得開心已經好好。（追番佢？）冇諗，我同佢有共識，大家都搞好事業先，之後先再諗呢啲嘢。」
採訪：音樂組