伊健獲TVB採訪成無間道
鄭伊健昨日為下月舉行的「鄭伊健友情歲月演唱會澳門站」舉行記招，大會特別安排三名小朋友分別以浩南、聶風和華英雄的伊健經典電影造型出現，大搞氣氛。
上年伊健在紅館個唱反應熱烈，現今移師澳門舉行，他希望下一站是日本，因自2000年後都未再到當地開個唱，令去年不少日本歌迷要飛到香港捧場，而因十二月紅館檔期不批，故留待明年有多些場數才開Part II。伊健又稱陳小春因檔期關係，屆時未必能再做嘉賓，至於嘉賓名單暫時保密。
自言身份特別
雖然伊健是四大唱片公司歌手，但昨日無綫亦有派隊來做訪問。伊健自言身份特別，因與無綫有藝員合約有點尷尬，所以他都希望事件快些解決，並笑言：「自己好似無間道，如果出席電影宣傳就可以用廣東話，但如同唱歌有關都要講番國語，呢啲係互相尊重。」
余安安做索媽
此外，伊健與小春再度合作的黑色幽默古惑片《飛砂風中轉》將於20日上映，伊健笑說：「拍第一集古惑仔已經係14年前，我同小春都做咗古惑佬啦，今次講我哋拒做大佬，接咗先知有小春，導演話特登畀個驚喜我哋！」劇中由余安安演伊健母親，安安姐說：「角色好有難度，做一個成日吸毒嘅阿媽！」小春則大讚安安姐「索媽」！ 文：音樂組