任達華拖真假老婆慶功

任達華憑電影《歲月神偷》勇奪《第29屆香港電影金像獎》最佳男主角，羅啟銳亦憑《歲》片奪得最佳編劇，加上早前電影在柏林影展勇奪「水晶熊」獎，所以《歲》片演員及導演包括任達華、吳君如、張婉婷和羅啟銳等，前晚相約食飯慶祝。張婉婷帶備金、銀色的熊仔環保袋送給君如與任達華，寓意各人陸續在各大國際影展上大放異彩，吳君如亦帶備高級紅酒到場與眾分享。

拍起鐵路辛酸史

出爐影帝任達華帶同太太琦琦出席晚宴，他說：「今晚終於一家團圓食餐飯，金像獎後我唔喺香港，君如又忙，導演又忙於寫劇本，今日終於約到，我哋好多心事傾o架。」問到是否接拍羅啟銳一部講述華工到舊金山起鐵路辛酸史為題材的電影？他說：「今晚趁機問吓導演，最好喺冬天拍，因為氣氛好啲。（女主角？）君如啦。（照收平價？）父子價、親子價都好，大家太好感情，金錢係買唔到開心。」

君如笑言要「老公」陳可辛送她大大粒鑽石戒指。（資料圖片）

（左起）手拿金銀熊仔環保袋的吳君如、任達華、張婉婷和琦琦相約聚首一堂慶祝。

要老公送大鑽戒

另外，陳可辛監製的《十月圍城》在金像獎連奪八個大獎，問到身為「老婆」的君如如何慶功？她笑言：「其實佢應該送禮物畀我，好想收好大粒鑽石戒指，最好貴到佢都買唔起。聽落好似好膚淺，其實係我想畀個目標佢，等佢繼續努力做得更好。」

文：影視組