祖兒阿嬌半億掃風水樓
藝人無懼樓市高峰期，一浪接一浪摸頂入市，據知，容祖兒和鍾欣桐（阿嬌）特別於母親節前各擲2,700多萬元購入西環180度海景豪宅，二線尾藝人唐詩詠更升呢去跑馬地睇樓，富貴逼人。
雖然昨日股市又跌逾300點，但樓市依然暢旺高企，樓價升完又升，甚至踏入97後的高峰期，不過仍無阻一眾藝人入市勇氣，繼周潤發、古天樂以億億聲買樓後，本報收到消息，祖兒和阿嬌亦加入明星買樓團，分別以2,700多萬購入西環新樓盤「維壹」，進駐西區風水地，助吸金兼旺桃花。
否認鰂魚涌買舖
據地產消息透露，祖兒和阿嬌各自睇中1,700多呎高層單位，坐享180度無敵海景及十幾呎高樓底，由於「維壹」屬英皇地產發展項目，據知兩人獲老闆楊受成開出「優惠價」，以樓價1.5%折扣入市做業主；事業如日中天的祖兒，一擲千金買樓可說易如反掌，然而，估唔到連復工年餘的阿嬌，亦豪擲2千幾萬買樓而面不改容，據知，阿嬌將於日內親往簽署買賣合約，而祖兒因不在香港，由他人代辦。
記者向英皇唱片及藝人管理部總監霍汶希（Mani）求證，她說：「之前祖兒同阿嬌親自去睇過樓盤，佢哋都好想置業，買單位用作投資。（豪擲2,700萬？）月供啫，唔係一筆過畀，祖兒希望送層樓畀媽咪做母親節禮物，因為要供樓，佢要畀力量自己更加努力工作。」至於有雜誌指祖兒和媽咪聯名以公司名義，斥資1,900萬元買入鰂魚涌49年樓齡舖位，Mani代祖兒否認，澄清沒有此事。
復工一年賺千萬
至於復工年餘的阿嬌，火速收復失地，踩行油拍戲、拍廣告、拍電視劇、開演唱會，據知短短一年多時間，已賺了近千萬酬勞，為阿嬌解去停工時的財困之危，並再度狙擊入市買樓。Mani說：「阿嬌希望買嚟自住，因為佢依家同屋企人住緊嗰度較細，佢好想買個大單位畀屋企人住得舒服啲。」問阿嬌是否賺近千萬？Mani避答說：「總之好多謝導演、廣告客戶支持，自己作為經理人都好開心。」
採訪：音樂組