何韻詩友誼小姐愛熱鬧
何韻詩為人爽直，加上毫不計較，經常傳送歡樂給朋友，故深受圈中人愛戴。阿詩笑言自己是樂壇的「友誼小姐」及「派對搞手」，最愛相約大班朋友搞BBQ聚會，藉以增進友情。
性格爽朗豪邁的何韻詩，平時最愛發放笑彈，有她在場的地方，絕對不乏笑聲，故她在圈中打滾多年，認識了大班知己良朋。阿詩的朋友圈範圍甚廣，同輩的計有劉浩龍、容祖兒和王菀之等，就連前輩級的「阿姐」汪明荃，亦與阿詩談得相當投契，全都是阿詩的「友」緣人。
冇乜防人之心
阿詩在熱播處境劇《女王辦公室》的演出備受讚賞，而角色與阿詩本身性格相近，恍如度身訂造，她說：「我唔係爭名逐利嘅人，而且唔計較，所以同男仔或女仔都做到朋友，我對朋友係坦承相對，真係交心，冇乜防人之心，唔會因為人哋點對我，我先點對人。」
問到有否被朋友欺騙，她搞笑地說：「還好啦，騙財又冇乜，騙色就更加冇啦，就算有畀人呃，我都好快唔記得。」阿詩不諱言自己沒有傷害性，她說：「我個人又唔係好八卦，我認為每個人本身有佢嘅優點同缺點，冇人係完美嘅，有好多嘢要靠自己去感受，而唔係一味『聽講』。」
設計益智遊戲
問到是否樂壇的「開心果」，她笑稱：「係『友誼小姐』同『派對搞手』，我會喺大時大節搞BBQ聚會，反而唔係好鍾意去K局，因為我愛玩益智遊戲，會花心思去設計遊戲畀大家玩。（愛熱鬧？）我愛我嘅朋友，熱鬧就一時時啦，有時我都比較深閨。」
採訪：專案組 攝影：沈健程
服裝：Diesel 造型：Kary Kwok
髮型：YoYo Hui@Hair Culture
化妝：Hubie Har（Atelier d' Arris）
場地：Pantray@銅鑼灣