曾志偉監察善款用途
「演藝界情繫玉樹關愛行動」大匯演圓滿落幕，曾志偉對於籌得三千五百萬善款大感滿意：「比上次四川賑災籌多咗千幾萬，呢啲代表香港人嘅心意，況且節目完咗仲不斷有捐款電話，所以暫時未能統計出實質總數。」他又謂會組織監察小組監察善款用途：「會分別捐畀幾個慈善團體，但要經小組評估，遲啲會有份詳細報告話畀大家聽。」至於台灣再發生6.6級地震，志偉謂要再了解實質情況，才考慮會否舉辦籌款活動。
另一召集人陳嘉上則表示唯一美中不足是謝安琪演唱時出現音響問題：「其實後台好亂，但各位藝人都冇所謂，大家好一條心。」張繼聰對於太太謝安琪亮相無綫卻「出師不利」，只淡然表示：「我當時都喺後台知道成個過程，佢隻碟冇聲，冇辦法！（唔好彩？）冇計，做善事都唔計得咁多。」而無綫直播大匯演收視平均廿五點，至於亞視則錄得五點收視。
