孫耀威陳美詩因病生情
【戴佩玉深圳直擊】孫耀威、王敏德、黎瑞恩、王馨平等昨在觀瀾湖出席十月底假南海舉行的「世界職業明星高爾夫球邀請賽」記者會，孫耀威被追問與陳美詩緋聞，承認因自己生病時對方經常探望而發展戀情。
孫耀威甫出現即遭追問在台灣被拍得手拖陳美詩，他靦覥表示剛從當地參加完好友的婚禮返港：「呢幾年我都冇刻意隱瞞感情事，總之影到啲乜咪乜囉。畀人影到我都知知哋，因為有個人成日喺我面前出現，我差啲想走埋去問佢係咪記者。（喺當地求婚？）冇呀。（係咪拍拖？）發展中。（都幾年喎。）唔係，係近呢一年，當我病咗嘅時候佢成日嚟探我，就咁開始嘅。」他笑謂最近身邊朋友排隊結婚，但自己的婚事則會聽候上帝安排。
王敏德唔怕緋聞
至於王敏德早前在澳門舉行個唱，被發現身邊有美相伴，他大方回應：「佢係我新請嘅助手，中英混血，幫我睇檔期仲睇埋account，同佢傳緋聞冇所謂，反正佢咁靚。」他又透露近日忙於籌拍一部關於飛虎隊的新片，屬意周秀娜擔任女主角：「套戲會係英語對白，集香港、美國資金，我都想搵個荷里活男演員出任第一男主角。」他又表示自己的右腿十字韌帶撕裂，正打算下月進行手術。
