婷婷恨嫁等安志杰提親

婷婷、江若琳、黎堅惠、阮小儀及少爺占等前晚出席b+ab時裝騷活動，同場有不少模特兒行騷。提到日前安志杰公然表示向拉姑提親，婷婷即甜笑地說：「點解喺你面前講而唔係喺我面前？（有冇求過婚？）大家商量過，但佢未正式求婚，要過爹哋媽咪嗰關，但好易。（幾時結婚？）只係商量過。（今年？）真係未求婚。（佢話要買花約拉姑食飯提親喎？）我唔知，但媽咪冇要求過。（肯唔肯嫁？）肯！同得佢一齊都肯，但依家工作重要，我哋彼此講過，我係佢、佢係我，我哋只係欠張婚紙、婚禮同婚戒。」

結婚必公開

婷婷坦言與男友經常見面，但否認同居，她說：「佢係個好傳統男友，而且仲好尊重長輩，佢好錫我爹哋媽咪，爹哋媽咪亦好錫佢。」問到會否秘密結婚？她說：「一定會公開，但唔好逼我。」

模特兒以比堅尼top配牛仔熱褲上陣，發放火辣辣魅力。

身穿吊帶連身短裙的模特兒十分誘人。

談到哥哥謝霆鋒奪得「最佳男配角」，婷婷說：「佢嗰日返嚟就瞓覺，我下午就湊咗Lucas去媽咪屋企，然後買玩具畀佢再返屋企食晚飯，男友都喺度。我都係第一次睇live show望住哥哥攞獎，我同媽咪仲拍晒手添。我一向好欣賞佢，對佢有信心。（以佢為目標？）佢應該攞，但我冇諗以佢為目標，我拍好首部電影先！」阿嫂張栢芝臨盆在即，問到會否幫手準備？她笑謂：「幫佢生呀？佢生過有經驗，要嘅嘢都有啦。」 文：名人組