鄭嘉穎拍劇受阻唔敢黑面

鄭嘉穎主演的《鐵馬尋橋》昨晚播映大結局,據知上周四平均收視升至34點,最高更有37點好成績,昨晚一班演員已相約一齊睇大結局兼慶祝。不過,早前鄭嘉穎與劇中細佬林子善(洪爺)上《今日VIP》做訪問時,有指被洪爺暗寸扮大牌,即場面黑。昨日嘉穎為新劇《怒火街頭》到深水埗取景時心情大靚,完全沒有被影響心情。

鬚根爛仔look

劇中飾演流氓律師的嘉穎,剪了一頭短髮、滿面鬚根加上踩踭鞋,爛仔味十足,吸引二、三百名街坊圍觀,但有不少人用閃光燈拍照,一度影響進度,但嘉穎依然好有耐性,不用埋位時更大方跟街坊影合照,他說:「知道深水埗之前有人掟鏹水彈,但唔擔心得咁多,我覺得呢個地方好可愛,邊度都搵到嘢食。」

係要畀人屈吓

對被指黑面,他帶笑回應:「呢啲等細佬講,根本係有人小題大做,將事實扭曲,細佬仲新,係要畀人屈吓。反而《鐵》劇收視愈嚟愈好,大家都好開心,如果結局收得,大家會商量再慶祝。」

文、攝:專案組