舒淇送祝福 林熙蕾拋胸扮聾
吳彥祖（Daniel）秘密小登科，昨晚為免喧賓奪主，撇下新婚太太Lisa S.單拖現身金像獎，一眾緋聞女友湊巧同場，但各人反應不一，舒淇作出鬼馬祝福、楊千嬅無厘頭拗柴，林熙蕾則裝聾愈叫愈走避談Daniel新婚。
Daniel與Lisa S.於本月6日在南非秘婚，於活動公開亮相時雙雙講大話否認已婚，大家以為這對新婚夫婦昨晚會以甜蜜姿態現身金像獎，沒料只得Daniel一支公登場，他解釋何以太太不來時說：「要尊重番啲演員，佢嚟就會搶鏡。（結完婚出席活動講大話喎！）其實今次結婚都唔係突然，一齊都八年，係遲早嘅事。」
由於南非婚禮只有親友及少數朋友參與，故將於7月中至8月期間在港再舉行派對，屆時廣邀朋友參與。渴望當爸爸的Daniel，笑言希望愈快生BB愈好。對於緋聞女友舒淇有份角逐影后，問到若由舒淇拿獎好不好？他大方說：「好，係好朋友嘛。」
千嬅三度恭喜
而另邊廂的舒淇手翹另一位緋聞男友張震行紅地氈，舒淇還作其小鳥依人狀，把頭挨到張震膊頭上，一副冧爆的樣子。談到前緋聞男友Daniel結婚，舒淇鬼馬地說有恭喜對方：「預咗啦！一齊咁耐，我打text恭喜佢添，不過唔使送禮物，佢哋咩都有。」
而楊千嬅則先後透過微博及短訊恭喜Daniel，她說在頒獎禮前於髮型屋巧遇對方，已順道再恭喜他一次，對於Daniel日前否認已婚，有講大話之嫌，千嬅說：「佢唔係發料咩？大話呢啲嘢就唔批評，喜事嚟嘅，朋友結婚就戥佢開心，未結過婚係唔明，結婚係個新開始，佢哋唔講係有佢原因，總之再一次歡迎佢哋加入Mr.同Mrs.行列。」不過當記者提及Lisa名字時，腳踏七吋高踭鞋的千嬅卻無厘頭突然拗柴，令人費解。
新郎哥畀人玩
至於曾被拍到與Daniel在台灣撐枱腳的林熙蕾，酥胸半露出現，剛下機的她因行程緊密，頒獎禮翌日便離港，當她聞得傳媒提及Daniel時，原本與傳媒言談甚歡的她即時「扮聾」，並愈叫愈走，匆匆入場，似乎刻意避談Daniel婚事。
Daniel與馮德倫（Stephen）一同頒發「新進導演」獎，兩人老友鬼鬼，甫上台即互窒，Stephen取笑Daniel當年拍《四大天王》玩娛樂圈人，今次到南非結婚，會否於一年後又突然說是假？Daniel聞言大讚老友好提議。
另外，Daniel與Lisa S.獲不少fans送上祝福，希望他們早生貴子。但討論區有網友怒插他們瞞婚，不過亦有網友祝福他們，更指吳彥祖結婚，香港又少一個Dream Man。
文：影視組