任達華發圍恨做雙影帝
入行超過卅年的任達華見證香港電影金像獎的成長，踏遍紅、藍、紫地氈的他遺憾03年未能與各同業齊戴口罩表同心，向張國榮作最後致敬。今年「梅開二度」獲影帝提名，他坦言最開心是拍到代表香港特色的電影，且透露不久將來會首執導演筒回饋戲迷。
金像獎踏入第二十九個年頭，華仔多次獲相關提名，早已以平常心去面對得失。見證着這個代表本地影業盛會舉行場地的多番遷移，期間更試過「破天荒」以藍、紫地氈取代傳統的瑰麗紅地氈，華仔不諱言：「藍地氈嗰年要遷就廣告贊助商嘛，但我覺得點都係傳統啲好，其實錢少有錢少嘅做法，唔一定要受人影響嘅啫。」他的堅持，就如多年來不接受任何品牌服裝贊助自己亮相盛會一樣，他說：「我覺得着自己嘅衫係最舒服，話晒我擁有模特兒身形嘛，哈哈﹗」
「口罩海」最深刻
03年身在英國拍攝《盜墓者羅拉續集》，結果沙士突襲香港、張國榮忽然離世，搞到當年金像獎盛會在一片愁雲慘霧下進行。當年螢光幕中一片「口罩海」，遮掩了眾人的容貌，卻不能掩飾大家淌血的心：「雖然未能喺現場同大家面對一切，但呢一幕情景至今仍好有印象，聽講當年出席嘅同業人數，係咁多年嚟最多嘅，顯示出大家其實好齊心。」
紅地氈是一眾女星爭妍鬥麗的好機會，要數搶鏡女星，華仔首推彭丹：「佢忽然喺個pat pat度開個窿，邊個夠佢嚟？好佩服佢嘅設計師囉。」拍檔吳君如當年不慎露點即登影后寶座，華仔隨即打趣：「今年佢翹實我入場包冇衰啦﹗」
拍《歲》憶父子情
《歲月神偷》大受歡迎造就了他與君如的「夫妻檔」，本屆齊入圍角逐影帝影后，華仔笑言當初與羅啟銳傾談不及三分鐘，對方請食的菠蘿包未吃到一半，他已首肯以「父子價」粉墨登場：「個故事好感動，而且係香港本土特色電影，好應該支持。」自幼喪父的他今次有意外收穫邊拍戲邊緬懷昔日父子情，他說：「爸爸畀我嘅感覺好惡，細個試過因為去游水，唔記得準時返屋企食飯，要跪喺度畀佢打，但亦培養咗我日後守時嘅習慣……拍戲打仔，咪諗番起先父嘅教誨囉，其實我細時仲百厭過我『兩個仔』呀。」
計劃做導演
拍《天水圍的夜與霧》拍到心力交瘁，雖然角色要迫害自己的至親，看得人心驚膽跳且不討好，但華仔卻另有睇法：「佢好可悲，只不過係小男人自卑感作祟。」兩套入圍電影皆是他得意之作，難怪華哥笑言最好「雙影帝」，更形容自己今次是「單打獨鬥」﹕「好似《十月圍城》係套高質素嘅商業電影，好多配角都幫到同樣入圍角逐影帝嘅王學圻更見突出。（想唔想攞獎？）希望幸運之神繼續眷顧我囉。」
從影超過卅年，華仔坦言正計劃轉戰幕後，盼明年能首執導演筒。其實早於《歲》片在永利街拍攝時，他已用攝錄機拍下紀錄片「初試牛刀」，雖未計劃如何作公開播放，但配樂、剪輯方面仍做到一絲不苟，讓自己暫過導演癮。
最佳男主角提名
王學圻《十月圍城》
任達華《天水圍的夜與霧》
郭富城《殺人犯》
任達華《歲月神偷》
劉青雲《竊聽風雲》
文：影視組