陳嘉上暗寸無綫慳水慳力

「第二十九屆香港電影金像獎」將於明晚假文化中心舉行，昨日陳嘉上與司儀鄭丹瑞進行拜神儀式及會見新聞界。由於今年直播權落入亞視手中，無綫索性省掉採訪人手，有線則派出主播李潤庭現身「支持」。

取消慶功宴

對於無綫之舉，陳嘉上語帶雙關地說：「都應該嘅，唔關佢哋事，唔播咪唔好浪費（TVB）同事啲時間同車費囉，支持環保呀！」據悉，無綫於金像獎當晚會派員到場採訪，亦安排於娛樂新聞台轉播紅地氈盛況，賽果則會以短訊形式於螢光幕作即時跟進，已算畀面。

大會昨日同時公布嘉賓名單，包括上屆影帝影后張家輝和鮑起靜，以及阮經天、趙又廷、林熙蕾、吳彥祖、舒淇、曾志偉等，相信近期熱爆的台灣過江龍阮經天及趙又廷，會是當晚最令人期待的嘉賓。擔任司儀的鄭丹瑞則以棟篤笑形式主持，而大會慶功宴亦會取消。

對於今屆金像獎星光黯然，陳嘉上表示：「唔係靠大堆頭嘅，有時卡士又會比去年好，呢啲嘢好難比較。」有份角逐女主角的趙薇落實缺席，陳嘉上戥對方榮升母親高興之餘，亦叮囑她要好好休息。至於被委以重任的鄭丹瑞笑說：「如果今次棟篤笑反應OK，我諗遲啲開十場呀！」他又撐無綫大方，不會強迫旗下藝員上台要講普通話。

有線非常畀面，派出主播李潤庭採訪。

近期大熱的阮經天（右）與趙又廷是金像獎當晚的重要嘉賓。（資料圖片）

再調動節目

無綫為了對抗亞視金像獎再調動節目，將曾志偉的《超級遊戲獎門人大爆發》「斬件」為兩part，中間時間則播放《鐵馬尋橋》大結局。另外，無綫外事部副總監曾醒明指旗下藝人今次亮相亞視，可講廣東話。

文：影視組