李樂詩抱巨B探親練忍功
李樂詩帶囝囝Maxton到美國見嫲嫲，首次搭飛機的Maxton興奮勁跳十個鐘，半歲大的Maxton體重22磅、有巨B稱號，難怪媽媽叫苦連天，抱到手瓜起𦟌！
李樂詩（Joyce）老公Ted的家人都在美國夏威夷，Maxton出世後，嫲嫲好期待抱抱乖孫，Joyce待Maxton六個月大，早前即帶同BB飛夏威夷探親，第一次搭飛機的囝囝非常興奮，她笑說：「最初仲驚佢扭計，點知佢完全冇喊，仲精力十足係咁跳，跳足十個鐘都唔肯瞓，搞到我廁所都唔敢去，要搵坐隔籬嘅日本男乘客幫我睇住BB，先去到洗手間，落機時真係謝晒！」
半歲22磅超可愛
六個月大的Maxton體重22磅，肥嘟嘟超可愛，Joyce笑說：「個個都問我餵乜畀佢食，佢要着18個月BB嘅衫，大家都叫佢happy baby，佢見人就笑，啲Auntie個個咬佢，仲咬到佢喊，我就抱到手瓜起𦟌，真係好過做運動，瘦咗兩磅。」她又帶囝囝到當地沙灘游水，她笑說：「佢最愛沖涼，雖然啲水好凍，又有浪，但佢玩得好開心。」
美國之行令Joyce更佩服家庭主婦，她說：「因為我冇帶工人去，自己要24小時照顧BB，真係好辛苦，因為時差頭一星期BB半夜三更都唔瞓，搞到我都冇得瞓，真係好佩服有幾個小朋友、仲冇人幫嘅家庭主婦，真係要向佢哋請教。」
文：音樂組